منحة SUSI

منحة SUSI ….دى عبارة عن منحة مقدمة من السفارة الامريكية للدراسة فى الولايات المتحدة لمدة من 4 : 6 اسابيع فى أجازة صيف 2017 .... يعنى مش هطعطلك عن الدراسة ...... المنحة ممولة بالكامل يعنى لو جبت ايس كريم مش هتدفع حقه و بيكون ليك مصروف كمان ... المهم انك تكون طالب فى الجامعة ومش فى السنة الأخيرة.

نخش فى المفيد

المنحة مكونة من أربع برامج ودى شوية معلومات عن كل برنامج :

1.Social entrepreneurship

لو انتا مهتم بريادة الأعمال وعندك فكرة كويسة تقدر تساعد لحل مشكلة فى المجتمع تقدر تقدم فى البرنامج ده وأهم حاجة أنك تقدر تعرض فكرتك بشكل كويس.

2. Religious pluralism

البرنامج ده للأشخاص اللى عندها فكرة عن الديانات المختلفة وخد بالك انك بتمثل دينك.

3. Civic engagement

فى حالة ان انت مش مهتم بريادة الأعمال ومعندكش فكرة عن الديانات المختلفة ... بس مهتم بالأنشطة التطوعية ... يبقى البرنامج ده ليك .. خاصة لو كانت الأنشطة التطوعية ليها علاقة بالمجتمع او السياسة .

4. Women’s leadership

ودى زى ما هى واضح من اسمها انها للبنات بس ( عنصرية  =D ) .... والأفضلية فى الأختيار بتكون للبنت اللى عنها مهارات شخصية وقيادية فى المجتمع.

=====================

طيب مين يقدر يقدم ؟!

لو انتا طالب فى الجامعة بس مش السنة الأخيرة تقدر تقدم ... ودرجاتك ملهاش علاقة بقبولك فى المنحة أو لا.

=====================

طيب إزاى أقدم ؟!
بس يا سيدى ده الحاجات المطلوبة

1. بيان درجات :

هتروح لشئون الطلبة تطلع بيان درجات للسنين اللى فاتت فى الكلية اللى انتا فيها ... ولو طلعهولك بالعربى هتروح تترجمة فى اى مركز ترجمة معتمد.

2. تحديد مستوى

هتروح الاميديست هتطلب تعمل تحديد مستوى للانجليزي بتاعك .... بيكون فى حدود 100 جنية ... ومش شرط انك تكون عملاق فى الانجليزى ... المهم إنك تكون بتقدر تفهم وتعبر كويس.

4. Personal statement

ودى بتكون عبارة عن 250 كلمة ... بتتكلم فيها عن نفسك وليه عايز تقدم فى المنحة دى وإيه اللى هتعمله لما ترجع مصر.. ودى تعتبر أهم حاجة فى التقديم عشان كده لازم تهتم بيها.

4. nomination Letter

هتروح لاى دكتور عندك فى الجامعة تخليه يكتب عنك ... ولو الدكتور مرضيش هتكتبه انت وتروح للدكتور يمضيه.

.5 Recommendation letter

هتروح تانى لدكتور، معيد، رئيسك فى الشغل أو حتى فى النشاط الاطلابى ... هيكتب عنك ويقول ايه المزايا اللى فيك

6. الصورة الشخصية

هتروح تتصور صورة رسمية ...بتكون 4*6 وخلفية بيضاء... اوعى تتصورها سيلفى 😄

7. صورة البطاقى او الباسبور

أظن دى معروفة  =D

=====================

شوية معلومات مهمة لازم تكون عارفها وانتا بتقدم :

◾ المنحة دى معروفة فى القاهرة والأسكندرية ... عشان كده بيكون فيه أولوية للمحافظات التانية ... ويا سلام لو انت من الصعيد.

◾ لازم يكون ليك علاقة بالأنشطة التطوعية والمجتمعية ... يعنى يكون ليك تأثير وفعال فى المجتمع .... ودى مهمة جدا عشان تثبت لهم انك شخصية قيادية.

◾ مفيش أى حاجة بتتكتب بخط الإيد غير الإمضاء بس.

◾ بعد ما تنتهى من الحاجات المطلوبة للمنحة هتروح تسملها بإيدك فى السفارة الأمريكية فى التحرير.

◾ لو عايز تتواصل مع السفارة وتستفسر عن أى حاجة عن المنحة ... ده الميل بتاعهم : CairoSUSIStudents@state.gov

◾ البوست ده مكتوب قبل التقديم ما يفتح بأسبوعين عشان تقدر تظبط الحاجات اللى هتحتاجها ... التقديم بيفتح يوم 10 نوفمبر وبينتهى يوم 10 ديسمبر .... ودى رابط الصفحة اللى بيكون فيها منح السفارة: https://egypt.usembassy.gov/pa/xchgs.html

=====================