كل ما تريد معرفته عن الانترفيو

متخافش من الانترفيو طول ما انت جاهز

#مكالمة_الإنترفيو

مبدئياً كدة خلينا نتفق.. إن طالما حضرتك بتدور على شغل و بتبعت الـCV بتاعتك يبقى المفروض تبقى مستعد في أي وقت إنك تستقبل مكالمة من الشركة و تبقى عارف المفروض تتصرف إزاي..

غالباً انت بتكون نايم و بتحلم بإمتحان خرسانة مثلاً و هاتصحى من النوم على صوت رنة موبايلك و انت طبعاً مش مركز و لسه مافوقتش.. و لما هاترد هايبقى صوتك باين عليه طبعاً إنك لسه صاحي من النوم مع إن الساعة 12 الضهر.. ما علينا.. المهم إنك هاتلاقي واحدة غالباً بيكون صوتها حلو بتكلمك من الشركة و بتقولك على ميعاد الـInterview و طبعاً إنت مابتبقاش مصدق نفسك من الفرحة و بتبقى متلخبط و مش مركز و المكالمة بتنتهي و فيه حاجات كتير إنت ما أخدتش بالك منها.. هانقولك عليها:

1- لازم تكون طول الوقت معاك ورقة و قلم مكان ما تروح عشان تكتب البيانات اللي هاتعرفها من المكالمة.. عشان ما تقعدش 5 دقايق بتدور على قلم و سايب الأبلة اللي بتكلمك على التليفون مايصحش برضه.

2- ميعاد الإنترفيو هي اللي بتحدده.. و لو لأي سبب طارئ الميعاد ده مايناسبكش اطلب منها تحديد ميعاد تاني لو أمكن بكل ذوق.. و طبعاً ده هاتعمله في حالة إن يكون عندك ظرف طارئ فقط مش عشان خارج مع خطيبتك مثلاً

3- فيه شويه حاجات كدة لازم تعرفها أثناء المكالمة.. أولاً اعرف مين اللي بتكلمك و اعرف إنت هاتقابل مين بالظبط.. و الإنترفيو هاتكون HR Interview و لا Technical Interview و هاتبقى فين بالظبط في مقر الشركة و لا في الموقع مثلاً.. و لازم تعرف العنوان بالتفصيل و بوضوح.. و طبعاً يا بشمهندس ماتسألهاش تقولها هاركب إيه و انا رايح

4- حذاري تغلط الغلطة اللي أغلب المهندسين بيغلطوها و تسأل عن الراتب في التليفون.. عشان ماتسمعش رد مايعجبكش.

5- في أغلب الأحيان اللي بتكلمك بتكون بتتكلم بسرعة جداً ماتعرفش ليه و حظك النحس إن انت موبايلك بيسقط شبكة أحياناً أو السماعة بايظة.. فالمعلومة اللي ماتسمعهاش بوضوح اطلب منها إنها تكررها تاني و ماتتكسفش.

6- حاول لو أمكن تطلب منها رقم تليفون تقدر تتواصل معاها عليه لأي سبب. 

#الإستعداد_للإنترفيو

1- لازم توصل في ميعادك بالثانية أو قبل ميعادك بدقايق بسيطة.. ماينفعش تروح بدري و ماينفعش أبداً تتأخر

2- مظهرك مهم و يفضل تكون لابس Formal

3- مافيش حاجة اسمها أذاكر إيه قبل ما أروح عشان انت مش عارف هاتتسأل في إيه بالظبط بس لازم تبقى عارف معلومات كافية عن الشركة و حجم أعمالها و مشاريعها و بتشتغل في إيه قبل ما تروح و دي ممكن تعرفها من على النت أو من معارفك

4- لازم تبقى مهيأ نفسياً و مجمد قلبك و مش خايف و مش متوتر و مش مرتبك و مش قلقان.. و ده طبعاً مستحيل، بس لو انت طورت نفسك صح ده هايديلك ثقة كبيرة في نفسك و هايفرق معاك كتير

5- هاتوصل الشركة في ميعادك زي ما اتفقنا و هاتسأل على الشخص اللي المفروض تقابله و اللي انت عرفت اسمه من المكالمة و غالباً هاتنتظر شويه بره عند السكرتيرة قبل ما تدخل تقابله حتى لو هو فاضي هايلطعك بره شويه كدة عشان يجيب آخرك، و مش معنى إن السكرتيرة ابتسمتلك إنها معجبة بيك.. لأنها طبيعة شغلها بتبتسم لكل الناس فلازم تتقل كدة يا هندسة

6- غالباً السكرتيرة هاتديلك أبليكيشن تملاها.. و دي بتكتب فيها نفس بياناتك اللي انت كاتبها في الـCV و ممكن تكون بالعربي أو بالـEnglish ، و احتمال تلاقي فيها بعض الأسئلة اللي هاتحتار في إجابتها و دي هانتكلم عنها بعد شوية

7- لو طلبوا منك تدفع أي فلوس عشان تاخد الأبليكيشن تملاها.. حتى لو خمسة جنيه بس، لف و ارجع تاني يا معلم.. و قبل ما تمشي ممكن تقولهم كلام أبيح لأن مايعملش كدة غير الشركات النصابة اللي بتتاجر ببطالة الشباب

8- "اتفضل يا بشمهندس" .. دي الجملة السحرية اللي هاتسمعها من السكرتيرة و هي بتفتح باب مكتب الشخص اللي هاتقابله و اللي هاتحس معاهه بشكل تلقائي إن جسمك نمل كأنك داخل لدكتور أسنان تعمل حشو عصب و اللي بعدها هاتبدأ #الإنترفيو

#أثناء_الإنترفيو

1- دلوقتي حضرتك داخل مكتب الشخص اللي هاتعمل معاه الإنترفيو بتقدم رجل و بتأخر رجل.. و طبيعي جداً إنك من جواك هاتكون مخضوض و متوتر و قلقان و خايف و مرعوب و مرتبك و متلخبط لأن دي تجربة جديدة عليك.. بس مهم جداً إن كل الحاجات دي ماتبانش عليك إطلاقاً بل بالعكس يبان إنك هادي و متزن و واثق من نفسك

2- من أهم الحاجات في الإنترفيو إن لم تكن الأهم على الإطلاق هي شخصيتك.. يعني هو مش هايقبلك عشان انت الأول على الدفعة و لا عشان انت شاطر و السلام.. الإنترفيو أغلبها بيكون إختبار للشخصية و المهارات أكتر من كونه إختبار فنيات.. لأن الفنيات ممكن تتعلمها في الشركة مع الوقت إنما شخصيتك ثابته مش هاتتغير

3- عشان توصله إنطباع كويس عن شخصيتك ممكن تقرا من على النت مواضيع كتير بتتكلم عن ده.. بس أنا هاقولك الخلاصة عشان عارفك هاتكسل تدور طبعاً

4- تمشي بهدوء و برزانه و انت داخل المكتب و تقفل باب المكتب وراك بهدوء.. و تقول تحية و انت داخل بصوت وقور كدة.. و تمد إيدك بالسلام و انت باصص في عين الشخص اللي بتسلم عليه بكل ثقة و تقول اسمك كتعريف بس ماتقولش قبلها لقب مهندس.. يعني لو اسمك أحمد حسن و انت بتمد إيدك عشان تسلم هاتقوله أحمد حسن و تقعد مكانك.. و لما تقعد تقعد برزانه كدة.. يعني بلاش تقعد على طرف الكرسي كأنك مكسوف.. و بلاش تغطس في الكرسي الجلد كأنك قاعد على شازلونج

5- فيه شويه حركات كدة بتدل على التوتر حاول تتجنبها.. زي إنك تفضل تهز في رجلك أو تتكتك بالقلم أو تشبك إيدك في بعض بعصبية أو تطرقع صوابعك.... إلخ

6- في الإنترفيو حاول إنك تكون هادي طول الوقت.. و مش متسرع في إجاباتك، فكر في كل كلمة هاتقولها و إيه اللي ممكن يترتب عليها

7- خليك على طبيعتك و فكها و ماتبقاش قافش كدة.. يعني مافيش مانع إن الإنترفيو يكون فيها قليل من التهريج أو الكلام في مواضيع عامة و ده بيكسر شويه من حدة الإنترفيو و بيخلق شيء من الود

أسئلة_الإنترفيو

بالنسبة للأسئلة الـ Technical دي طبعاً بتختلف على حسب الشغلانة اللي انت رايحها و ماتقدرش تتوقعها و اللي يقولك إن فيه أسئلة اسمها أسئلة الإنترفيو بتذاكرها قبل ماتروح يبقى بيشتغلك..

انت بتعمل اللي عليك و بتحاول تطور نفسك على قد ماتقدر و تبقى مستعد لأي سؤال، و على العموم مش ده موضوعنا دلوقتي.. لأن فيه أسئلة تانية أهم بكتير من الأسئلة الفنية و هي دي أصلاً اللي بتحدد مصيرك في الإنترفيو..

اللي عاوزين نتكلم معاكوا عليه النهاردة في الـPOST ده هي أخطر أسئلة هاتتسألها في أي إنترفيو.. و غالباً كلنا مابنعرفش نجاوب عليها إزاي..

#السؤال_الأول

=========

((((( انت ليه سيبت شغلك القديم...؟ )))))

و ده طبعاً مش هايسألهولك إلا لو كنت اشتغلت قبل كدة.. و ده بالنسبة لصاحب الشغل سؤال مهم جداً إنه يعرف إجابته منك و بيتحدد عليه أكتر من 50% من تقييمك.

لازم تكون عارف إن أكتر حاجة تهم صاحب أي شغل هي إنك ماتروحش تشتغل معاه كام شهر و بعدين تسيبه أول ماتلاقي فرصة أحسن لأن دي بتضر الشركة جامد جداً، فأصحاب الشركات مابيفضلوش يشغلوا المهندس اللي بيتنطط كتير و مش مستقر في شغل لأن ده بيخليه طول الوقت مقلق منك لأنه حاسس انك ممكن تسيبه في أي وقت.

عشان كدة لازم في ردك على السؤال ده ترد بذكاء

طيب تعالى كدة بيني و بينك نشوف هي إيه الأسباب الحقيقية اللي ممكن تكون بسببها سيبت الشغل القديم فعلاً..

(الفلوس- عدم الإستقرار- سوء المعاملة- الشركة أي كلام- تأخير الرواتب- بعد المكان- مافيش خبرة- تغيير نوع الشغل- تصفية الشركة- هما استغنوا عنك- مجهود زيادة بدون مقابل- مش مرتاح نفسياً.... إلخ)

مش هي دي الأسباب اللي عشانها أي حد بيسيب شغله فعلاً..

بس فيه أسباب من دي ماينفعش تتقال... لأن فيه أسباب منها لو قولتها يبقى تأكد تماماً إنك هاتاخد الصابونة و مش هاتقبل في الشركة دي ولا أي شركة تانية

طب تخيل معايا مثلاً لو انت كنت خطبت قبل كدة أكتر من مرة و فركشت.. و لما جيت تخطب تاني.. خطيبتك الجديدة بتسألك بتقولك انت ليه خطبت أكتر من واحدة و الموضوع ماكملش...؟

هل ينفع ترد تقولها أصل أنا كنت بسيب خطيبتي اللي معايا عشان بلاقي واحدة شكلها أحلى..!!

أكيد ساعتها مصيرك هايبقى أكتر من مصير أحمد حلمي في فيلم بلبل حيران

المقصود هو انك ماينفعش أبداً تقول لصاحب الشغل إنك سيبت الشغل القديم عشان الفلوس حتى لو كان هو ده السبب الحقيقي..

لأنه ساعتها هايرد عليك هايقولك "يعني لو اشتغلت معانا شويه و بعدين لقيت شغلانه تانية بفلوس أكتر من اللي هانديهالك هاتسيبنا..؟"

و ساعتها بقى يا معلم مش هاتعرف ترد تقول إيه و هايبقى شكلك بايخ.

و ماينفعش برضه تقوله عشان الشركة اللي فاتت كانت بنت ستين في سبعين و تفضل تشتم و تعيب فيها لأن ده برضه ممكن تقوله على شركته و انت ماشي منها في يوم من الأيام..

طب إيه الأسباب المنطقية اللي تخليك تكبر في نظره لما تقولهاله..؟

ممكن تقوله عشان مستوى أو طبيعة الشغل ماكنتش بستفيد منها أي خبرة و أنا في بداية حياتي أكتر حاجة محتاجها الخبرة..

ممكن برضه تقوله.. الشركة مكانش فيها استقرار و مبيأمنوش على الموظفين أو مقر الشركة أو الموقع بعيد جداً عن محل إقامتك و بضيع نص اليوم في المواصلات.

أهم حاجة إنك ماتقولش عشان الفلوس فيفهم إنك مادي، أو تعيب في الشركة القديمة فيفهم إنك غدار و مالكش أمان، أو عشان كانت شغلانه متعبه و بتبذل مجهود كبير فيفهم إنك فرفور و بتدور على الأنتخه.

و عاوزك في الجزئية دي تخلي بالك من حاجة مهمة.. إنك ماتكدبش لأنه ممكن بكل سهولة بعد ماتمشي يرفع سماعة التليفون و يتصل بالشركة اللي كنت فيها و يسألهم عنك و يعرف الحقيقة.

#السؤال_الثاني

==========

((((( آخر راتب كنت بتقبضه كام..؟ )))))

السؤال ده يعتبر سؤال خِطر خِطر يعني.. لأنه بيمهد للسؤال الثالث اللي هاييجي بعده.. و عشان كدة لازم تبقى ناصح كدة و مدقدق عشان مايتضحكش عليك..

لو راتبك في الشركة القديمة كان 1000 جنيه مثلاً، هل تقول الراتب الحقيقي و لا لأ..؟ و هل لو قولت الراتب الحقيقي فعلاً اللي كنت بتقبضه هل ده ممكن يأثر على الراتب اللي هايديهولك ولا لأ..؟

مبدئياً كدة لازم تكون عارف إن الكدب في الإنترفيو مش هايكون في صالحك عشان ممكن بسهولة جداً تتفقس و ساعتها يبقى انت طيرت الشغلانه منك.. و في نفس الوقت كتير من أصحاب الشركات لو لاقاك كنت بتاخد راتب قليل.. هايخسف بالراتب بتاعك الأرض و هايبيع و يشتري فيك

يبقى انت لازم تكون ناصح في إجابتك على السؤال ده و السؤال اللي بعده اللي يعتبر #أخطر_سؤال_في_الإنترفيو و عارفين إن أغلبكوا مستنيين السؤال ده

#السؤال_الثالث

==========

((((( عــــــــاوز راتب كــــــــام )))))

ده يقى السؤال الأصعب و الأخطر و الأكثر إحراجاً و اللي بيترتب عليه وضعك المادي في الشركة .

إزاي تتفق على الراتب:
....................................

عاوزك #تركز معايا كدة في الكلام اللي جاي ده عشان ماحدش يشتغلك..

من أكتر اللحظات الحساسة في أي إنترفيو.. هي الكلام عن الماديات لأنك مابتكونش عاوز تبين إنك شخص مادي و في نفس الوقت مش عاوز تاخد راتب قليل..

طيب هو انت لما بتقدم في شركة.. المفروض اللي بيعمل معاك الإنترفيو هو اللي يقولك على الراتب و لا هو اللي هايسألك انت عاوز كام..؟
بص يا سيدي الفاضل.. في الشركات الكبيرة غالباً بيكون عندهم لائحة بالرواتب مافيهاش كلام.. يعني خريج دفعة كذا بياخد كذا و بالتالي هو مش هايفاصلك في الراتب، إنت لو قبلت في الإنترفيو هايقولك على الـOffer بتاع الشركة و ليك مطلق الحرية انك تقبل أو ترفض، بس أغلب الشركات المتوسطة و الصغيرة مابتعملش كدة.. يعني موضوع الرواتب ده بيمشي بالحب، تقدر تقول كدة تفاوض مع الزبون اللي هو انت.. فصاحب الشغل غالباً هايسألك انت عاوز راتب كام؟ أو متوقع تقبض كام؟ أو تقدر نفسك بكام؟
و دي تحديداً بتبقى أكتر لحظة محرجة في أي انترفيو.. و انت و شطارتك بقى في إنك تعدي منها

طبعاً إنت بتكون ماصدقت أصلاً إن فيه شركة كلمتك و روحت تعمل إنترفيو.. و أمنية حياتك دلوقتي هي إنك تقبل في الشغلانة دي..
فانت بتكون ما بين نارين.. خايف تطلب راتب كبير فالشغلانة تطير منك و تروح لحد تاني هايطلب أقل منك.. و في نفس الوقت برضه مش عاوز تقول رقم قليل و ترخص نفسك و تكتشف بعد كدة إن انت اتضحك عليك و كان المفروض تطلب أكتر من كدة..
هي دي بقى المعادلة الصعبة..!!!

طب #إيه_التصرف_الصح....؟

لازم تبقى عارف يا باشمهندس "سعرك في السوق" كام.. يعني المهندسين دفعتك و اللي بنفس إمكانياتك و مؤهلاتك تقريباً متوسط رواتبهم كام..
طب و دي بقى نعرفها منين....؟
إحنا هانقولك... smile emoticon
بالنسبة للشغل جوة مصر.. المهندس حديث التخرج دفعة 2015 المفروض بأي حال من الأحوال راتبه مايقلش عن من 1500ج لـ 2000ج
كل دفعة أقدم بتزيد على الأقل 500ج.. يعني خريج 2014 المفروض ياخد على الأقل 2000 و خريج 2013 ياخد 2500 و خريج 2012 ياخد 3000 و خريج 2011 ياخد 3500...... إلخ
و الأرقام دي قابلة للزيادة و بتعتمد على حاجات كتير منها طبيعة الشغل و حجم الشركة.. و إمكانياتك و مؤهلاتك و خبراتك و الكورسات و البرامج اللي معاك.... إلخ

طبعاً أنا عارف و متأكد و أنا باكتب الكلام ده إن بعض المهندسين ممكن يكونوا شايفين كلامي ده فيه شيء من المبالغة.. و إن الرواتب دي مش موجودة على أرض الواقع، بس أحب أرد عليكوا و أقولكوا.... (لأ) إنتوا غلطانين.. الرواتب دي موجودة بالفعل، و أنا شخصياً أعرف مهندسين متخرجين دفعة 2014 و شغالين جوه مصر و راتبهم يعدي الـ3500ج ، بس للأسف إنتوا اللي مش عارفين قيمتكوا، و أغلب المهندسين بيرخصوا نفسهم و بيتهاونوا في حقوقهم.. و أغلب أصحاب الشركات بيستغلوا النقطة دي لصالحهم.
أحب كمان أقوللكوا إن فرد الأمن النهاردة أو الأوفيس بوي.. اللي غالباً بيكون مامعهوش مؤهل أو بالكتير إعدادية.. راتبه مابيقلش عن 1500ج
فماينفعش تبقى مهندس و اتعذبت 5 سنين في الكلية و أهلك صرفوا عليك دم قلبهم عشان يشوفوك مهندس و يفرحوا بيك و في الآخر تقبل براتب 800ج و لا 100ج و الأرقام اللي بنسمعها دي!
هاتقوللي يا بشمهندس.. ماهو ده اللي موجود قدامنا.. يعني نقعد في البيت من غير شغل؟ هاقولك لأ طبعاً.. بس إنت لو عرفت قيمتك و عرفت تتفاوض صح على الراتب هاتعرف تاخد راتب كويس.

طيب خد عندك كدة شوية النصايح اللي هاقولك عليها دي و حطها حلقة في ودانك:

لما المدير يسألك.. عاوز راتب كام؟ اعمل محاولة كدة إنك تتهرب من السؤال و ترمي الكورة في ملعبه هوه ...... إزاااااااااي؟

هاترد عليه بكل لباقه و شياكة و هاتقوله: "الصراحة مش المفروض إن أنا اللي أقيم نفسي.. إنتوا شركة كبيرة و أكيد ليكوا اللايحة اللي بتحدد الرواتب، و أفضل لو حضرتك اللي تقوللي العرض المادي بتاع الشركة و أنا لو يناسبني هاوافق و لو مش مناسب هاعتذر"
كدة يا معلم انت يبقى عملت معاه السليمه و حطيته في خانة اليك و هايضطر هو اللي يقولك على الراتب مش العكس.. بس هو بقى ممكن يطلع أنصح مني و منك و يردهالك تاني و يقولك.. لأ لازم انت اللي تقول تقبل براتب كام أو تقدر نفسك بكام.. أو يعمل حاجة أسهل من كدة و يخليه سؤال إجباري في الأبليكيشن اللي هاتملاها قبل الإنترفيو..
طبعاً في الحالة دي مافيش مفر من إنك تطلب رقم محدد، بس خلي بالك كويس قوي (ماترخصش نفسك) و لازم تطلب أكتر من الرقم اللي انت عاوزة بشويه عشان تسيب مجال للتفاوض (الفصال).. أيوه زي ماقريتها كدة صح #الفصااااااال ... عشان هو هايفاصلك و يساومك على الراتب عشان يديلك أقل راتب ممكن كأنه بيشتري طماطم من السوق، و لو يطول إنه يشغلك ببلاش هايشغلك.

يعني لو انت مثلاً خريج دفعة 2014 و هاتشتغل مهندس موقع و عاوز تقبض 2000 ج و هو سألك على الراتب اللي انت عاوزة.. انت طبعاً مش هاتقوله 2000، هاتقوله 2500ج مثلاً عشان هو هايقولك كتير و الحوارات اللي انتوا عارفينها دي لحد ما في الآخر ترسى على الرقم اللي انت عاوزة.

دلوقتي بقى هاقولك على #5_خدع_شيطانية بيعملهم أصحاب الشركات عشان يضحكوا على الشباب الغلابه اللي زي حالاتكوا..

#الخدعة_الأولى (التثبيت)
=================

و دي من الخدع المشهورة و اللي بتحصل كتير... هايقولك طب يا هندسة.. إنت هاتشتغل معانا أول 3 شهور (فترة إختبار) براتب قليل، و في نهاية الـ3 شهور دول هانعملك إعادة تقييم و نديلك الراتب اللي انت عاوزة (كداااااااااب)
و انت عشان طيب فهاتوافق طبعاً و تقوله Deal
لأ يا معلم.. استنى لما ارسيك ع الحوار انت مش تلميذ.. الراجل ده كدة بيثبتك عشان توافق و غالباً مش هايزودك ولا حاجة ده كلام فض مجالس بس عشان يجر رجلك و بعد كدة هايبقى يتبع معاك سياسة النفس الطويل..
و عشان ماتقعش في الخدعة دي أنسب رد تقولهوله.. هو إنه يديلك الراتب اللي انت طالبه و لو شغلك ماعجبهوش في فترة الإختبار يبقى يمشيك خالص من الشركة

#الخدعة_التانية (التسويــف)
=================

و هي إنه يأجل الإتفاق على الراتب لحد مايشوف شغلك الأول.. و ده طبعاً ماتوافقش عليه عشان بعد كدة انت اللي صباعك هايبقى تحت ضرسه و هاتندم و خليك فاكر دايماً إن اللي أوله شرط آخره نور

#الخدعة_التالتة (الإشتغاله)
=================

و هي إنه يوافق على الراتب اللي انت هاتطلبه و تيجي تقبض آخر الشهر تلاقي الراتب ناقص 400ج مثلاً.. تروح تشتكي للمحاسب إن الراتب ناقص و مش ده الرقم اللي انت متفق عليه فالمحاسب يقولك لأ يا بشمهندس أصل الراتب اللي انت اتفقت عليه ده بيتخصم منه ضرايب و تأمينات، فطبعاً عشان ماتقعش في الخدعة دي فلازم وانت بتتفق على الراتب تعرف الراتب ده Net Salary ولا Gross Salary

#الخدعة_الرابعة (الفخ)
=================

يعني حضرتك هاتتفق على الراتب اللي انت عاوزة و بعد ماتشتغل تكتشف إنك بتصرف نصه على المواصلات عشان مافيش عربيه للشركة و مكالمات التليفون بتاعت الشغل عشان هما ماادولكش خط موبايل و إقامه و أكل و شرب في الموقع عشان مافيش مستلزمات معيشيه مناسبة و إنك بتمشي بعد مواعيد العمل الرسمية بـ3 أو 4 ساعات بدون مقابل، و إن أي يوم تاخده أج
ازة يتخصم من مرتبك فلوس..
و عشان ماتقعش في الخدعة دي يبقى انت المفروض قبل ماتتفق على الراتب تستفسر عن الإنتقالات و البدلات و مكالمات الموبايل و السهرات و الأجازات و الإضافي و خلافه

#الخدعة_الخامسة (كلام_الليل)
===================

عارف انت المثل بتاع عشمتني بالحلق خرمت أنا وداني.. أهو ده اللي هايحصل معاك بالظبط.. هايتفق معاك على راتب قليل و يوعدك و يعشمك بأي كلام في رغيف.. زي مثلاً إنه كل 3 شهور فيه Bonus بيتصرف للموظفين، أو إن فيه مكافآت و حوافز و أرباح و دلع.. و طبعاً كل ده ولا هاتشوف منه حاجة

الخدعة دي اتهرست في 100 انترفيو قبل كدة و عشان ماتقعش فيها يا معلم يبقى انت أهم حاجة تركز عليها هي الراتب الشهري الثابت، أما الحاجات التانية دي لو جت يبقى خير.. لو ماجتش إنت ليك مرتبك آخر الشهر اللي انت متفق عليه.

منقول من صفحة : summer training&jobs

#شير 

شاركنا بتجاربك مع الانترفيوهات :)